នុះ!!ពេលជួបសិស្សនិទ្ទេសAថ្ងៃនេះសម្តេចនិយាយពីគ្រូរាំដល់ដងទង់ជាតិទៀត(វីដេអូ


រាជធានី​ភ្នំពេញ​៖​ លោកគ្រូដែល​រាំ​តាំង​ពីក្លោង​ទ្វារ​វិទ្យាល័យ​រហូត​ដល់ដង​ទង់ជាតិ​ ក្រោយ​អនុវត្តតាម​ការ​សន្យាជា​មួយ​សិស្ស​​នោះ​ ពេល​នេះ​ទទួល​បាន​កោតសរសើរ​យ៉ាង​ខ្លាំង ​ពី​លោកនាយករដ្ឋមន្ត្រី​​កម្ពុជា​​ នៅ​ចំពោះ ឥស្សរជន​ជាន់ខ្ពស់​ លោក​នាយក​ នាយិកា​​សាលា និង​សិស្ស​ឆ្នើម​និទ្ទេស​ A ​ទូទាំង​ប្រទេស​ ៤២៤​នាក់​។​​
​​​ទោះបីជា​សម្តេចតេជោ ​មិន​បាន​បញ្ជាក់​ពី​ឈ្មោះ​លោក​គ្រូ​​​​ ក្នុង​ជំនួប​សំណេះសំណាល​ជាមួយ​សិស្ស​និទ្ទេស​ A​ នៅ​ព្រឹក​ថ្ងៃ​ទី​១៤​ ខែ​តុលា​ ឆ្នាំ​២០១៧​​ ​ក៏​ដោយ ​ប៉ុន្តែ​សម្តេច​នាយករដ្ឋមន្ត្រី​​ បាន​លើក​សរសើរ​​ជា​ច្រើន​ចំណុច​នូវ​សកម្មភាព​របស់​លោក​គ្រូ​ ទៀ ​សុធា​​ ដែល​បង្ហាញ​ពី​ទឹកចិត្ត​ដ៏ល្អ​ផូរផង់​​លោកគ្រូ​ ក៏​​ដូចជា​លោកគ្រូ​អ្នកគ្រូ​ផ្សេង​​​​ទៀត ​ដែល​ចង់​ឲ្យ​សិស្ស​ល្អ​​​ សិស្ស​ពូកែ​ រហូត​មាន​ការ​​​ភ្នាល់​ជាមួយ​សិស្ស​ ​ដើម្បី​បំផុស​និង​ជំរុញ​ឲ្យ​សិស្ស​កាន់​តែ​ប្រឹង​ប្រែង​យក​និទ្ទេស​ A ឲ្យ​បាន​។​​​​





ក្រោយ​សិស្ស​ខ្លួន​បាន​ជាប់​និទ្ទេស​ A មែន​ លោក​គ្រូ​ មិន​បាន​មិន​គោរព​សម្តី​នោះ​ទេ​ គឺ​លោកគ្រូ​ គណិតវិទ្យា​ នៅវិទ្យាល័យ​ ហ៊ុន សែន ភ្នំពេញ​ថ្មីរូប​នេះ​​​ ក៏បាន​អនុវត្ត​តាម​ការសន្យា​ជាមួយ​សិស្ស​ពិត​ប្រាកដមែន​​ ដោយ​រាំ​តាំង​របងសាលា​រហូតដល់ដង​ទង់ជាតិ​។​ នេះ​ស​បញ្ជាក់​ពី​គុណធម៌​របស់​លោក​គ្រូ​ក្នុង​ការ​ឲ្យ​គោរព​និង​តម្លៃ​​ ដល់​សិស្ស​ ដោយ​មិន​ក្បត់ពាក្យសន្យាខ្លួន​នោះ​ទេ​។​
គួរបញ្ជាក់ឡើងវិញផងដែរថា នៅព្រឹកថ្ងៃទី១៤ ខែតុលា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់កិត្តិយសអញ្ជើញជួបសំណេះសំណាល និងផ្តល់រង្វាន់ដល់ក្មួយៗសិស្សានុសិស្សដែលប្រឡងបានជាប់និទ្ទេស (A) ទូទាំងប្រទេសចំនួន៤២៤ នាក់ ដែលពិធីនេះធ្វើឡើងនៅវិមានសន្តិភាពរាជធានីភ្នំពេញ។




នៅក្នុងពិធីនេះ ក៏មានការចូលរួមពីឪពុកម្តាយ អាណាព្យាបាល លោកគ្រូ អ្នកគ្រូ និងមិត្តភក្តិសាច់ញាតិបងប្អូនផងដែររបស់ក្មយៗផងដែរ។ ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៧នេះ គឺមានបេក្ខជនទទួលនិទ្ទេស (A) ចំនួន ៤២៤នាក់។ សរុបទាំងអស់គឺមានសិស្សានុសិស្សប្រឡងជាប់បាក់ឌុបចំនួន ៦៣,៦៦៨នាក់ ស្មើនឹង ៦៣.៨៤%។
មុននឹងចាប់ផ្តើមកម្មវិធី សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍រំលឹកអំពីខួប៥ឆ្នាំ (១៥ តុលា ២០១២-១៥តុលា ២០១៧) នៃការយាងសោយទីវង្គត់របស់ សម្តេចព្រះនរោត្តម សីហនុ ព្រៈបរមរតនកោដ្ឋ ។ នៅក្នុងឱកាសនោះ សម្តេចតេជោ បានអញ្ជើញក្មួយៗសិស្សានុសិស្សទាំងអស់ងើបឈរគោរពវិញ្ញាណក្ខន្ឋដល់អតីតព្រះមហាក្សត្រផងដែរ។ សម្តេចតេជោ ក៏បានរំលឹកអំពីការតស៊ូលះបង់ស្ទើរពេញមួយជីវិតរបស់ព្រះអង្គដើម្បីជាតិមាតុភូមិ ជាពិសេសក្នុងការទាមទារឯករាជ្យជូនជាតិមាតុភូមិ និងម្យ៉ាងវិញទៀត ព្រះអង្គជាតួអង្គសំខាន់ក្នុងកិច្ចព្រមព្រៀងទីក្រុងប៉ារីស ២៣ តុលា ផងដែរ ដែលធ្វើអោយប្រទេសជាតិមានសុខសន្តិភាពមកទល់សព្វថ្ងៃនេះ។





សម្តេចតេជោ ហ៊ុន សែន នាយករដ្ឋមន្ត្រី សប្បាយរីករាយ និងមានមោទនភាពយ៉ាងខ្លាំង ចំពោះការខិតខំប្រឹងប្រែងរបស់ក្មួយៗទាំងអស់បន្ទាប់ពីក្រសួងអប់រំយុវជន និងកីឡាបានធ្វើការកែទម្រង់កន្លងមកដើម្បី ពង្រឹងគុណភាពសិក្សា។ ពីមួយឆ្នាំទៅមួយឆ្នាំចំនួនសិស្សដែលប្រលងបាននិទ្ទេស (A) មានការកើនឡើងជាបន្តបន្ទាប់ ទាំងអស់នេះដោយសារការខិតខំប្រឹងប្រែងរបស់ក្មួយៗផ្ទាល់ និងការផ្តល់ឱកាស និងជំរុញលើកទឹកចិត្តពីឪពុកម្តាយ និងអាណាព្យាបាលផងដែរ។
ទន្ទឹមនេះដែរ សម្តេចតេជោ បានរំលឹកដល់ក្មួយៗទាំងអស់ត្រូវខិតខំប្រឹងប្រែងថែមទៀត ជាពិសេសត្រូវមានការដឹងគុណចំពោះគ្រូបង្រៀង ដែលជាអ្នកមានគុណទី ២ របស់យើងដែលធ្លាប់បានអប់រំបណ្តុះចំណេះវិជ្ជាដល់យើង។ សម្តេចតេជោ ក៏បានសុំអោយរៀបចំថ្ងៃរំលឹកគុណគ្រូ នៅថ្ងៃទី ៥ តុលា អោយបានជាប់ជាប្រចាំដើម្បីអោយក្លាយទៅជាវប្បធម៍មួយដ៏ល្អក្នុងសង្គមយើង។ សម្តេចតេជោ ហ៊ុន សែន បានអរគុណនឹងកោតសរសើរចំពោះលោកគ្រូ អ្នកគ្រូ អាជ្ញាធរ អ្នកពាក់ពន្ធ័ទាំងអស់ ដែលបានចូលរួមវគ្គបំប៉នដល់សិស្សានុសិស្សកន្លងមក មុនការប្រឡងតាមបណ្តា ខេត្តផ្សេងៗ។





សម្តេចតេជោ ហ៊ុន សែន នាយករដ្ឋមន្ត្រី បានលើកទឹកចិត្តដល់សិស្សានុសិស្សដែលប្រឡងមិនជាប់ពេលនេះ ត្រូវខិតខំបន្ថែមទៀតនៅឆ្នាំក្រោយ ហើយបើប្រឡងមិនជាប់ទៀតគឺអាចបន្តរៀនបរិញ្ញាបត្ររងសិនដើម្បីបន្តបរិញ្ញាបត្រក៏បាន។ សម្តេចតេជោ ហ៊ុន សែន បានបញ្ជាក់សារជាថ្មីទៅកាន់សិស្សានុសិស្ស និងអាណាព្យាបាលទាំងអស់ថា ដោយមានការស្នើសុំកន្លែងចូលប្រឡងដើម្បីចូលរៀនវិជ្ជាពេទ្យដោយកន្លងមកលុះត្រាតែជាប់និន្ទេស (A) ឬ (B) ទើបចូលរប្រឡងបាន តែពេលនេះ មិនថានិទ្ទេសអ្វីក៏ដោយអោយតែជាប់បាក់ឌុប គឺអាចប្រឡងចូលរៀនមុនវិជ្ជាពេទ្យបានគ្រប់ៗគ្នា។
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់រង្វាន់លើកទឹកចិត្តសិស្សានុសិស្សនិទ្ទេស (A)ទាំងអស់ ក្នុងម្នាក់ៗថវិកា ២លានរៀល និង iPad ម្នាក់មួយគ្រឿង ព្រមទាំងប្រាក់កាក់ស្លឹងខ្មែរ (បោះពុម្ពឆ្នាំ ១៥១៤ ដែលបានស្រាវជ្រាវយកពីប្រទេសហូឡង់មកវិញ) ចំនួន១ ជាអនុស្សាវរីយ៍ផងដែរ។ ចំពោះលោកគ្រូអ្នកគ្រូដែលជានាយកសាលា បានអញ្ជើញចូលរួមសរុបចំនួន ១៥៨ នាក់ ដែលម្នាក់ៗទទួលបាន ថវិការចំនួន ១លានរៀល ហើយសាលានីមួយៗដែលមានសិស្សជាប់និន្ទេស (A) គឺក្នុង១សាលាទទួលបានថវិការ ៣លានរៀល។




នៅក្នុងឱកាសនេះដែរ សម្តេចតេជោ ហ៊ុន សែន នាយករដ្ឋមន្រ្តី បានថតរូបអនុស្សាវរីយ៍ជាមួយក្មួយៗសិស្សានុសិស្សដែលជាប់និទ្ទេស (A) ទាំងអស់ក្នុងបរិយាកាសស្និទ្ឋស្នាល និងសប្បាយរីករាយក្រៃលែង៕


វីដេអូសម្លេងជាក់ស្តែង



Previous
Next Post »